EXTRA: "ANTIANONAN MESTER KUMINSA PAPIA MIHO HULANDES"
Geschreven door OCaN Redactie maandag 30 november 2009 20:41
Bron: Extra (Curacao)
on 30-11-2009 09:00
WILLEMSTAD.- Durante un anochi di debate y diskushon na Amsterdam, Minister Eberhard van der Laan, entre otro responsabel pa integrashon, a bisa ku e problema prinsipal di nos muchanan ku ta kousa problema na Hulanda ta falta di abilidat i boluntat pa ekspresá nan mes na hulandes.
E anochi di debate tabata organisá pa Vereniging Antilliaans Netwerk (VAN) i Organisatie Caribische Nederlanders (OCaN). E ex-anchorman di notisia di mainta di televishon nashonal hulandes NOS, señor Rocky Tuhuteru tabata e moderador di e anochi aki. Den un sala yen ku mas di 80 persona di nos komunidat na Hulanda, Minister van der Laan a splika kiko gobièrnu hulandes i instanshanan lokal ta hasiendo pa redusí e problemanan ku un grupo di nos muchanan ta kousa. Minister van der Laan a splika ku el a hasi "veldwerk" promé ku el a kuminsá sigui desaroyá e plannan pa tur grupo di nashonalidat minoritario na Hulanda. Huntu ku sr. Glen Helberg di OCaN, el a bishitá vários grupo di mucha yòn entre e edat di 16 te 28 aña na Dordrecht y Den Helder. El a nota ku lamentablemente kasi tur ta mucha hòmber yu di Kòrsou i ku e problema prinsipal ta unu di no por papia hulandes drechi.
Pa por integrá na Hulanda i pa por desaroyá bo mes i haña trabou tur hende mester por papia hulandes drechi. Ounke den e kaso di muchanan Antiano e ta enfatisá ku komo nos tur ta miembro di reino Hulandes, ku un pasaporte Hulandes, e no ta papia di "allochtoon" ni di "nieuwe nederlanders" pero e ta preferá di papia di gruponan sosial ku problema. Minister van der Laan a splika ku e ta mira bon resultado di e "gerichte groepsaanpak" na Hulanda.
E ta splika tambe ku na Oropa, Hulanda ta e pais ku ta invertí mas di tur 27 pais den programanan spesialisá pa yuda kada grupo sosial. Hulanda ta invertí 4.5 mion euro (Nafls. 12 mion) pa yuda guia y integrá un grupo relativamente chikitu di antiano ku problema na Hulanda. E plan Hulandes ta adresá e problemanan den tres paso.
1) Resolvé problema personal via atenshon personal, ayudo di un sikólogo òf via un coach.
2) Resolvé problema di famia via organisashonnan di apoyo familiar.
3) Resolvé e "overlast" ku grupo di mucha ta hasi riba kaya via un enfoke polisial estrikto, pero huntu ku organisashon di antiano lokal. Minister van der Laan a bisa tambe, ku e ta rekonosé ku mayoria di antiano na Hulanda ta eksitoso i ku bon trabou.
Bo no ta ripará nada di e grupo grandi aki ku ta kompletamente integrá den komunidat Hulandes.
Segun van der Laan e proyektonan aki ta tresiendo bon resultado. Kriminalidat di hóbennan antiano entre 18 ku 24 aña ta bahando levemente. Ounke segun e semanal Elsevier te ainda e nivel ta hopi haltu ku 40% di mucha antiano na Rotterdam den kriminalidat, miéntras ku e nivel nashonal na Hulanda ta 18%. Afortunadamente desempleo den e grupo di hóbennan aki si a baha di 15.4% pa 7.9% den e delaster 5 aña.
Durante e debate e lider di OCaN - e asosashon prinsipal ku ta representá antianonan na Hulanda, y interlokutor pa gobièrnu Hulandes - tambe a konfirmá ku ta inakseptabel ku nos muchanan na Hulanda no por papia hulandes drechi.
Aunke e pasado kolonial por kontribuí na un falta di boluntat pa papia hulandes, ta lógiko ku tur antiano ku ta bini Hulanda mester papia hulandes drechi. Si nos bai Merka òf Latinoamérika, tambe nos mester papia ingles òf spañó drechi.
OCaN ta apoyá aktivamente tur programa pa antiano siña papia hulandes drechi. Tantu van der Laan ku Helberg ta haña yamer ku e instrukshon di hulandes na skol na Antia ta birando kada aña mas malu.
Na Antia, hulandes ta keda e lenga stranhero prinsipal banda di papiamentu òf ingles. E otro punto ku OCaN ke kambia den henter reino Hulandes pa por ataká un di e kousanan prinsipal ku ta hasi nos muchanan faya sosialmente, ta falta di responsabilidat di hopi tata antiano. Huntu ku Minister van der Laan, OCaN ta trahando pa por kambia e "vaderschapswet." Un mama lo bira obligá legalmente di identifiká tata di e yu. Di e manera aki tambe e tata lo bai karga e responsabilidat legal pa e yu. Esaki ta inkluí paga e mama gastunan di alimentashon pa por finansiá kriansa di e yu ku e ta laga den man di e mama so.
Minister van der Laan a sera e anochi di e mesun manera ku el a habri su spich. Gobièrnu hulandes su so no por resolvé tur problema ku nos muchanan ta hinka nan kurpa aden. Gobièrnu hulandes mester di un embolbimentu i un apoyo aktivo di tur antianonan na Hulanda pa por yuda guia e grupo di mucha aki den un bon direkshon. Sino e grupo aki lo sigui stigmatisá e gran mayoria di antianonan ku si ta eksitoso na Hulanda, ku un imágen negativo.
Pa: Thomas Domhoff - Hulanda
....riba e foto por mira e minister van der Laan i tambe Glen Helberg durante e enkuentro na Ulanda.....