Minister Leeflang alansa e website:www.tula4freedom.com
Geschreven door OCaN Redactie dinsdag 18 augustus 2009 11:24
Minister di edukashon, kultura i Deporte di antia ulandes, sra. Omayra Leeflang, a lansa djaluna atardi e wepsait www.tula4freedom.com Meta di e wepsait ta pa hasi Tula un fuente di inspirashon moderno pa henter pueblo di Kòrsou pero prinsipalmente nos hubentut.
Históriko i fundamental ta e palabranan di Tula na pastor Schink "Un ta nos tur ta yu di e mesun tata, Adam ku Eva." E palabranan aki ta e deklarashon di libertat, igualdat i hermandat, riba kua nos komo pueblo di Kòrsou ta fundá. E palabranan históriko aki ta mustra bon kla ku Tula nunka a lucha kontra hende blanku sino na fabor di libertat pa tur. E deklarashon fundamental aki di Tula ta buta Tula, sigun minister Leeflang, riba mesun plano ku lidernan grandi manera Marthin Luther King jr i Nelson Mandela.
"Tula a lucha pa libertat na Kòrsou for di un punto di bista universal, p'esei e meresé un lugá riba e plataforma di libertat global", asina Minister Leeflang, a bisa. "Tula4freedom", ta un inspirashon despues di apertura di e eksposishon: "Onder de hoede van de Heer"; eksposishon di Marons ( katibunan ku a hui) na Sürnam i a funshoná komo predikado.
Ku e website Tula4freedom, nos ta posishoná Tula komo símbolo di libertat, igualdat i hermandat, riba e plataforma global. Aksesibel pa tur prinsipalmente pa nos hubentut. Un di e akshonnan inovativo riba e website aki ta e Relato Tula, skirbi pa tres studiante di UNA, ku riba mi enkargo a hasi un research riba bida di Tula. E tres studiantenan ta: Jonathan Estanista, Shahayra Rosalina i Raymond Jansen
Ku e relato aki un generashon hóben a identifiká nan mes ku e lucha asina históriko i universal di nos emansipashon. Intenshon ta, sigun Minister Leeflang, pa envolví mas hóben ku diferente proyekto ku nos lo publiká riba e websait aki.