Glenn Helberg: Mester bin ku alternativa sí pa yuda nos hóbennan
donderdag 09 december 2010 19:13
Parlamento Hulandes a rechasá un moshon di partido PvdA pa kontinuá ku e asina yamá 'Bestuurlijke Arrangementen', e maneho speshal pa ataká problemanan di Antiano, den e 22 siudatnan kaminda hopi Antiano ta biba. Segun Glenn Helberg, presidente di OCaN, gobièrnu Hulandes mester bin ku alternativa sí, pasombra ku djis kita e sèn for di proyektonan e problemanan no ta solushoná.
Tabata di spera ku mayoria miembro di parlamento lo a rechasá e moshon aki di PvdA. 'Lástima ku nos hendenan no a bai vota, pa duna otro partidonan un chèns.' Helberg ta spera ku un bes aki ku tin elekshon pa provinsia, nos hendenan sali kas i bai vota pa krea un otro konstelashon polítiko ku esun ku tin awor.
Atendé ku síntoma, neglishá e kousa
Gobièrnu Hulandes lo no kontinuá ku e areglo eksistente pa ataká problema di prinsipalmente hóbennan, pero no a bini ku un alternativa. Nan ta bisa ku e aserkamentu aktual no a traha, pero nan ta puntra nan mes dikon e no a traha? Segun Helberg si bo atendé solamente ku e síntomanan di e problema i deskuidá e kousa nada lo no traha. Loke por a resolvé e kousa lo tabata mas sosten pa yuda mayornan eduká nan yu, mas ayudo pa siña tatanan kon ta un bon tata.
Sinku minister den tres aña
OCaN semper a boga pa enfoká mas riba kousanan di e problema ora a papia ku diferente minister enkargá ku e problemátika di hóben antiano. Helberg: 'Pero kada bes ku bo kaba di papia, mester kuminsá di nobo, paso tabatin sinku minister den tres aña ku e kartera akí.' Presidente di OCaN a sigui bisa ku kada minister nobo ta bin ku su maneho nobo. 'Ainda no a papia delaster palabra. Nos lo papia ku e minister aktual Donner tambe.'
Solushoná problema huntu
Mester wak awor tambe kon e diferente munisipionan lo reakshoná. 22 munispio rònt Hulanda tabata haña finansiamentu den kuadro di e maneho akí pa ehekutá e ayudo. Huntu ku MAAPP i e ‘beraad’nan ku ta konsehá nan mes munisipio, mester habri e kombersashon ku mandatarionan riba e nivel ei. OCaN ta pidi nos hendenan pa aserká nan konseho di munisipio i papia ku e polítikonan ku nan a skohé. 'Mustra dikon ta importante pa Hulanda i Kòrsou solushoná e problemanan ku nos a krea huntu', segun Glenn Helberg.
http://www.rnw.nl/papiaments/article/mester-bin-ku-alternativa-si-pa-yuda-nos-hobennan